慘慘慘！巴士失控撞巴士，撞完巴士撞的士，咁就搞出三條人命，的士司機連同兩名乘客不幸死亡，仲未計幾十個巴士乘客受到不同程度嘅損傷，真係慘絕人寰！
車禍現場係柴灣道一條長命斜，昨日早上十一點左右，一架新巴喺亞公岩道交界越過對面線撞向一架九巴同一架的士，據講當時肇事巴士並無減速迹象。另外咯喎，經歷過生死時速嘅新巴乘客憶述，事發嘅時候聽見巴士司機突然慘叫一聲，然後失去知覺，口角流口水倒於地上。新巴喺無人駕駛嘅情況之下，砰砰磅磅，左揩右碰，撞到東歪西倒，車上乘客好似搖骰盅咁一仆一碌。最傷嘅係被撞成一堆捲曲廢鐵嘅的士，消防員出盡九牛二虎之力先至可以將司機同乘客救出車廂，可惜最終都係返魂無術。枉死乘客一個來自瑞典，一個來自英國，名副其實客死異鄉，諗起都令人心酸。
照咁講，出問題嘅巴士司機應該係突然病發，忽然之間失去控制巴士嘅能力，結果闖出彌天大禍。功夫茶想問一問巴士公司，平時有冇規定司機要定期檢查身體嘅呢？開講都有話啦，年年驗身，令你放心。如果巴士司機暗藏隱疾，開車中途突然病發，對於乘客以及其他道路使用者而言好得人驚啫。
講到呢度，功夫茶諗起另一個故事。內地江門鶴山市一位五十一歲巴士司機，上星期駕駛載有十多名乘客嘅巴士，途中突然感到唔舒服。呢一位司機非常之咁機警，為咗避免發生交通事故，強忍痛楚將巴士停靠路邊再開着死火燈示警，隨即倒地不省人事。車上乘客報警求助，司機因為急性心肌梗塞最終搶救無效死亡。目擊者表示，事發之時正值小學生放學高峰期，如果冇做緊急安全措施，後果不堪設想。呢一位鞠躬盡瘁死而後已嘅司機感動大批網民，被封為「鶴山最美巴士司機」。
柴灣發生奪命車禍之後，警方話喎，會循三個方向調查，包括有冇機件故障，有冇人為疏忽，有冇人干犯交通罪行。其實計功夫茶話齋，最好順便查一查，巴士公司有冇規定司機定期檢查身體，如果冇咯喎，確係有必要認真考慮增設呢一項規定囉，事關人命安全最重要，冇理由任得隱疾纏身嘅司機橫衝直撞啫，吓話？畢竟江門鶴山市嗰一個最美巴士司機萬中無一，好難臨危不亂緊急停車，勇救全車乘客之餘仲要顧全途人性命。
喂，講真o架，巴士公司實在有必要安排司機驗身。醉駕或者藥駕已經夠晒危險啦，病駕嘅禍害隨時有過之而無不及。一句到尾，職業司機不驗身，乘客途人不放心！