新一屆立法會近半都係新丁議員，履新後陸續約班前線記者食飯聯誼，殊不知最近卻有種新風氣湧現，講緊嘅係部分新丁議員有意無意間會帶多幾個不速之客出席飯局，據聞佢哋就係來自內地嘅收風人。有知情人士話，呢班內地收風人會以唔同形式出現，既有已退休嘅中聯辦官員，亦有某某同鄉會嘅領導等，記者見突然殺出幾個不速之客，嗰一刻真係敢怒不敢言，惟有望個飯局快啲完。
究竟呢班收風人會喺個飯局上做乜呢？佢哋除咗細心聆聽新丁議員同記者嘅對話外，有時仲會主動出擊就當前熱點議題收風，好似早前德育及國民教育風波喺社會吵得熱烘烘，內地收風人會主動問吓大家對國教有乜睇法。不過，最離譜嘅情況係，有時內地收風人「主客不分」，講嘢仲多過個議員，仲要肆無忌憚交換埋卡片添，即係擺明唔怕人知道佢哋嘅身份，仲叫記者得閒到佢哋工作嘅省市行吓添，話會搵專人招待喎。
有知情人士話，有關方面可能擔心一啲新丁議員較少應付傳媒，所以搵人出席（目及）實情況，避免啲新丁出亂子都唔出奇。不過，約人食飯無端端加咗啲三唔識七嘅人喺度，反映約食飯嘅議員都幾冇禮貌，搞到記者以後約食飯前，要問清楚有乜人在座先至敢去。