政情：對滋擾有心得 長毛反寸借錢電話
政制及內地事務局尋日去立法會簡介就纏擾法進行諮詢收集所得嘅意見，社民連梁國雄（長毛）話，如果當局可以確保新聞自由不受侵犯，佢非常樂意政府盡快立法制約纏擾行為，尤其係對付收數等滋擾性嘅活動。長毛就自爆依家日日都收到唔少銀行或財務公司嘅廣告電話，問佢經濟有冇困難，使唔使借錢周轉。雖然長毛成日畀人話佢拉布滋擾他人，但對住呢啲騷擾嘅推銷電話，佢都笑住話連佢都冇晒符喎。
不過，經過無數次電話廣告騷擾後，長毛已經對佢哋嘅銷售策略非常熟悉，有時仲會諗計仔反寸對方。例如有人問佢借唔借錢，佢就會用一副非常認真嘅口脗回答：「我想借二億，你借唔借呀？」長毛解釋，對方一聽到佢咁講，就知道佢係喺度玩嘢，通常就會即刻收線唔睬佢，而佢就可以幸免於難唔使煩。佢又話，仲有人日日打幾百個電話畀佢，但由於嗰啲人喺電話度設定咗隱藏來電，所以連佢都唔知係邊個打嚟。
長毛話，呢啲滋擾性嘅行為真係唔可以縱容，但由於唔知來電者姓甚名誰，所以就算去報警都唔知警察可以點阻止喎。如果政府最後真係就纏擾行為立法，相信長毛一定受惠。