房屋署陸續喺全港抽籤新一輪議員辦事處，按照慣例落選議員需將辦事處騰出供當選議員抽籤，據聞新界東嘅房署辦事處位置出現「大洗牌」，白鴿黨代主席劉慧卿（卿姐）決定走入將軍澳，原屬黃成智嘅上水清河邨同粉嶺華明邨辦事處，最終分別落入民建聯陳克勤同新民主同盟范國威手中，而後者更首度喺北區有落腳點，幾乎完整覆蓋成個新東，黃成智喺元氣大傷下將來想東山再起，睇怕真係難過登天。
新一輪議員辦事處音樂椅又展開，呢個係源於房署規定，只有新當選議員先可以租用房署轄下嘅議員辦事處位置。地區消息話，卿姐除咗固守原位於沙田嘅辦事處外，幸運抽中原屬民建聯副主席劉江華位於將軍澳寶琳嘅辦事處，基於地理位置優越且人流較為暢旺，據聞卿姐有意把調景嶺辦事處資源轉移至將軍澳寶琳，希望進一步開拓中產雲集嘅將軍澳，同樣想開拓將軍澳嘅仲有公文袋。
至於新界西方面，民建聯梁志祥就抽到支好籤，據聞佢成功抽得位於天水圍天悅邨嘅議員辦事處，可望進一步鞏固同深化佢喺元朗同天水圍嘅地區工作。地區工作最緊要有落腳點，究竟落選議員能否東山再起，要視乎有冇奇招或高人指點喇！