政情：泛民「波」都屈到扁

邵善波向立法會申請加開嘅非公務員全職顧問職位，年薪及福利達二百八十萬元。邵善波解釋，中策組喺上屆政府嘅分工唔係太有系統，而且一直冇全職顧問負責監察民意，所以佢希望將強化中策組發掘及培養人才，以及喺電子媒體同網上平台監察民意嘅功能，所以要加開職位。

卿姐想剝削邵發言權

中策組要擴大職能，工作增加要加位係無可厚非，令一向同政府對着幹嘅泛民一時技窮。民主黨劉慧卿惟有搬番邵善波日前有關政府面對社會批評亦要推動輿論、唔可以坐喺度捱打嘅言論老屈邵善波，話佢令公務員成為政治工具。成日講要言論自由嘅卿姐，竟然仲話希望邵善波當日係最後一次發言喎。邵善波即刻反駁點解佢唔可以發言，又澄清要推動輿論嘅係政府，唔係中策組，叫卿姐聽清楚個訪問錄音先。

工黨李卓人就例牌一聽到加位就話係疊床架屋，又將中策組同內地社科院、中宣部、組織部畫上等號，質疑全職顧問高靜芝發掘人才係為咗安置「梁粉」，話決策局搵人時要通知高靜芝，等佢畀意見係弄權。邵善波就反駁話：「呢個唔係高女士發嘅指示，係特首發嘅指示」，對於被指「僭建」中策組，佢就話「我哋點會害自己，請一個人唔做嘢係冇好處o架！」

其實正如邵善波話齋，中策組自成立以來，作為政府參謀組織就有收集民意、為政府出謀獻策嘅功能，就好似泛民政黨夠成日藉輿論製造民意攻擊政府啦，依家根本就係賊喊捉賊，唔通中策組坐喺度乜都唔做捱打咩！