中環出更：廠商會廈門搞香港品牌節
福建富人多，名車名牌一籮籮，中華廠商聯合會會長施榮懷（Irons）都瞄準商機，明年四月底將攻入廈門搞香港品牌節，逾一百個香江品牌一呼百應，齊齊北上賺人仔。搶攻廈門，Irons同展覽服務有限公司主席吳永嘉（Jimmy）係專家，呢兩位沙煲兄弟都係福建人，對閩南同胞口味特別有心得。
點心奶茶最受落
Irons話，由廈門、漳州及泉州組成嘅「閩南金三角」，人口閒閒哋一千四百萬，消費力驚人，港商食到呢條水，認真肥仔。當中又以高檔電子產品、港式麵食、點心、奶茶等最受歡迎。Irons又醒港營商錦囊，賣嘢要標榜安全、衞生、高質素，千祈唔好抱住散平貨心態。
講到廈門美食，Irons首推「薑母鴨」，煮法係以薑來炆鴨，好惹味；Jimmy就鍾情「土筍凍」，以海蟲加入上湯及大菜糕，然後雪凍來吃，咁有賣點，引入香港都唔錯噃。兩兄弟尋晚記者會後，已急急飛往廈門為品牌節開路，認真勤力。品牌發展局主席陳淑玲同副主席黃家和都唔執輸，過兩日都飛去越南考察，當地盛產平靚正海產，運來香港嘅話，大家又有口福喇。
卓妮