中環出更：趙樓神回饋浸大
浸會大學尋日舉行頒授榮譽博士學位典禮，人稱「趙樓神」嘅長江實業執行董事趙國雄、國學大師饒宗頤及其徒弟、SML集團主席孫少文（Simon）等五人都榜上有名。曾經喺七十年代做過浸大校友嘅趙國雄話，浸大歷來好少頒授榮譽畀自己友，佢屬於第三個，對校友可謂一大鼓勵，讓自己有多啲機會回饋母校。
趙國雄話，雖然佢只係喺當時嘅浸會書院修讀咗兩年社會學，但兩年學到嘅嘢就好有用。話說當年香港搞緊學運，咁啱學校搵咗一批思想開放嘅美國學者授課，擴闊咗佢嘅多角度思維，培養咗佢敢於創新嘅性格。佢笑稱，依家出嚟做嘢，遇到刺激嘅事物都較易接受，仲話連賣樓都可以好激喎！
饒老笑自己「債台高築」
作為饒宗頤學術館之友創會會長及主席嘅Simon，今次跟饒老同台獲殊榮，會長之一嘅王庭聰、學術館館長李焯芬同一班「家己冷」齊到賀。李焯芬話，雖然饒老年屆九十六歲，但雙手依然好有力，堅持每日寫書法，每次都好專注投入。佢仲大爆饒老童心未泯，戲稱自己「債台高築」，皆因唔少人都搵佢題字，然而佢嘅「產量」有限，所以欠落唔少人情債。
明德學院校董會主席張永霖（Linus）夫婦都到場祝賀Simon，原來Linus經常同Simon傾藝術經，受對方感染之下，自己都收藏咗唔少饒老嘅墨寶，更笑言愛喺屋企「換畫」，因為屋企幅牆位置有限，所以久唔久就要換另一幅畫作欣賞。
卓妮