曾幾何時，香港公立醫院設備齊全，儀器先進，比私家醫院有過之而無不及，令港人引以為榮。可惜到咗今時今日，好多公立醫院唔只殘殘舊舊，甩皮甩骨，連儀器都落後過人，有人形容連第三世界都不如，簡直失禮死人！
唔係功夫茶亂噏o架。呢，就以種菌化驗嚟講，公立醫院仲用緊阿爺嗰代嘅化驗儀器，要一至兩個星期至知道結果，而英國九成醫院以及部分本港私家醫院早就用緊電離測試儀，一日就知結果，你話係咪失禮死人吖。救人如救火，時間就係生命，對於生死繫於一線嘅病人嚟講，早一分鐘知道化驗結果，就可以早一分鐘得到醫治，公立醫院連化驗都慢幾拍，直情係靠害喇。正如衞生防護中心細菌耐藥性衞生防護項目主席何栢良話齋，公院病理部雖然人才濟濟，但化驗儀器猶如「第三世界」，醫生幾叻都冇用。
係人都知，家陣病菌種類愈嚟愈多，愈嚟愈惡，兩個星期至有化驗結果，病人分分鐘死咗都唔知乜事。好似最近發生嘅醫學美容事故咁吖，三名受害者感染咗膿腫分枝桿菌，一樣要等兩個星期至知化驗結果，想唔死都幾難。最令人莫名其妙嘅係，何栢良多次向當局反映，要求引入新儀器，但醫管局就一味話要考慮成本效益、承擔能力及病人安全喎，九唔搭八！
喂，人命關天，救人要緊，唔通醫管局真係窮到連新化驗儀器都買唔起？公共醫療資源不斷增加，政府一年最少撥款三百幾億元，唔通呢啲錢全部用來畀醫管局高層出糧？講到呢度，大家終於知道點解公立醫院服務質素每況愈下，醫療事故無日無之嘞啩，醫管局肥上瘦下，前線醫護人員士無鬥志，逃亡潮愈演愈烈，加上儀器落後咯喎，唔出事至奇！
講開又講，公立醫院點只化驗儀器猶如第三世界，其餘設施都唔好得去邊嘅咋。好似瑪麗醫院咁，貴為港大教學醫院，而且係港島區龍頭，但就甩皮甩骨，牆身裂痕闊到可以放入硬幣，手術室窄到無法存放儀器，甚至要用人手清洗醫療儀器，連港大外科學系主任盧寵茂都忍唔住話「原始到好似喺屋企洗碗」！
最離譜嘅係，醫管局將公立醫院搞到烏煙瘴氣，而衞生署管理私家醫院一樣亂七八糟，甚至有醫院將地皮用嚟起豪宅，當局都闊佬懶理，真係豈有此理。難為當局仲話要發展醫療產業喎，其實計功夫茶話齋，醫療產業係假，官商勾結就真。嗱，點樣收拾醫管局呢個爛攤子，就睇新政府喇！