有人話女人搵老公，其實暗藏政經，「嫁個有錢人」，是經濟掛帥；「最緊要人品好」，是政治掛帥；「要有錢人品又好」，是兩者兼顧；當然，內地人民更與時並進，女人嚷着要嫁「高富帥」，除了有錢人品好，又要高大威猛兼貌唔似劉德華都要像金城武。看來，一眾「矮貧醜」者，只好年年傷悲地迎接「光棍節」！
其實，唔單止女人搵老公暗藏政經，香港嘅醫療產業，原來一樣暗藏政經！唔好以為老朽老作，審計署發表嘅衡工量值報告，除了踢爆私家醫院無王管、濫收費外更亂象叢生，經濟掛帥，根本睇唔到「醫者父母心」嘅醫德！
更離譜嘅還在後頭，由於當局監管不力，多年前政府批嘅土地，原擬興建可提供六百張病床嘅私院，誰知竟有一半土地被用來發展私人物業，病床大減，而地產商「悶聲大發財」唔知賺了幾多個億，看官，這不是表面興建醫院普救眾生，而暗藏經濟掛帥益了地產商？
至於「政治掛帥」嘛，又不禁令人想起「人不在江湖，江湖卻有他傳說」的曾蔭權爵士，佢在位期間，令到衞生署與私家醫院「融洽」成「合作夥伴」關係。所謂「合作夥伴」，講得好聽啲，就係「政治掛帥」，講得明白顯淺啲，就係官商勾結、利益輸送！貪曾難道真有菩薩心腸？喺住宅用地嚴重不足下，竟一早為私院發展預留了四塊地皮，唉，遲吓又改變土地用途變成豪宅，你話香港有乜辦法唔貧富兩極、怨聲載道，噪音特多，繼續沉淪啊！