政情：建築師施家殷愛唱Ｋ
全球第二大建築師樓凱達環球（Aedas）創辦人之一嘅施家殷（Kyran），日前以地產行政師學會會長身份，帶領一班地產商代表坐船考察港珠澳大橋工程。佢話由珠海望番大嶼山，覺得呢個工程好宏偉，相信將會帶旺珠海橫琴同澳門嘅樓盤同配套發展。
身為特首梁振英（CY）好友嘅Kyran坦言，CY邀請過佢加入城規會，但佢強調自己係商人，對搵錢嘅興趣大過政治喎！熱心貢獻社會嘅Kyran又話，如果可以加入有關社會民生嘅委員會，佢會更有興趣。現年四十六歲嘅Kyran笑言，自己係大細路，閒時愛唱K，仲要唔新嘅歌唔唱，依家熱爆嘅《江南Style》佢都有跳埋一份。
Kyran早前代表公司到印尼峇里島領亞洲建築大獎，期間不忘享受日光浴，點知隨身帶嘅太陽油太細樽，防曬力不足，搞到佢曬燶咗少少。原來Kyran好貪靚，曾經做過男士美容中心嘅代言人，但佢話近期忙到冇時間做美容，搞到臉上嘅虎紋愈來愈明顯，睇嚟要勤加保養喇。