政情：廠商吳永嘉 輸波不輸勢
生意人忙足成個星期，最好趁周末舒展吓筋骨。尋日中華廠商聯合會就喺維園舉行工商體育邀請賽，除咗會內運動健兒組隊落場外，仲向工業總會、中華出入口商會等友好團體廣發英雄帖，實行喺球場鬥一番。廠商會副會長吳永嘉（Jimmy）都有落場打羽毛球，睇唔出平時官仔骨骨嘅佢，揮拍勁度十足，打得似模似樣，雖然最終飲恨敗北，都算雖敗猶榮喇！
Jimmy話，佢由十一、二歲開始打羽毛球，後來仲打到入青年軍，但係升讀大學後就擺低咗球拍，眨吓眼已十幾年，幾年前佢搵番昔日球友打番波，奈何球技已跟唔上。尋日同佢組成男子雙打嘅戰友係廠商會副會長吳清煥囝囝吳政鋆，為現役青年軍成員，仲啱啱代表香港出賽添，可惜仍不敵對手。