政情：小肥張獲長者粉絲慰藉
苦戰立法會財務委員會廿二個鐘頭，勞工及福利局局長張建宗（小肥張）都仲未說服到班議員通過長者生活津貼（長津）撥款，兼夾講咩都畀人鬧，但小肥張尋日出席社聯嘅長者日活動時卻「和聲」處處，講咩都有長者「和聲」支持。所以話呢，呢啲活動認真抵去，須知道自我感覺良好係無價嘅！不過，唔知去到下星期五財委會再度審議長津，小肥張尋日袋埋嘅慰藉會剩番幾多呢？
小肥張前日開財委會開到夜晚十點幾鐘，昨早又再出發去社聯舉辦嘅長者日活動，咁頻撲之唔係要冧班長者囉。聽講小肥張喺活動上去到邊都有人爭住同佢影相，講咩都有長者拍手支持，當小肥張喺台上宣布長者明年三月有望可以兩元搭小輪去愉景灣嘅時候，仲有長者交足戲好驚奇回應話：「真係o架？」班長者咁識做，相信對月來深受到拉布困擾嘅小肥張嚟講，絕對係唔小嘅慰藉。
尋日活動完結後，一班記者叫小肥張講兩句啦，估唔到嗰刻仲有一班忠實嘅長者粉絲留守聽足全場，而且仲聽到頭頭是道，不時點頭和議，又拍手支持，連扑咪都有粉絲撐場，小肥張今次真係無憾兼不枉此生喇！