政情：別墅冇酒!貪曾搬走？
秋高氣爽最啱就係去郊外燒烤（BBQ），特首梁振英（CY）尋日就宴請中央政策組一眾全職及非全職顧問去到行政長官粉嶺別墅花園BBQ，點知中策組首席顧問邵善波冇帶酒招呼大家，CY就喺別墅翻箱倒籠先搵到四支平價紅酒，只好四圍枱每枱供應一支，觥籌交錯間啲酒好快就飲晒，大家眼望望口侃侃。為何咁大間別墅只得四支酒咁少呢？莫非同我哋之前獨家踢爆貪曾喺卸任前從禮賓府搬走咗大批酒有關？
CY尋晚喺粉嶺別墅宴請中策組，諗住收吓風睇吓大家對施政報告有咩意見。除咗全職顧問捧場外，四十六個非全職顧問都有卅人出席，確係相當捧場。當中唔少人都係第一次去粉嶺別墅，大家都覺得好新奇，席間言談甚歡、氣氛熱烈。一班成員幫政府出謀獻策咁幫得手，CY就準備咗唔少佳餚，有羊扒、牛柳、金菇牛肉卷、燒豬頸肉等，雖然話係BBQ，但其實已由工人燒好，真係招呼周到。
CY見大家咁開心，就諗住同大家飲番兩杯，點知邵善波竟然失策冇帶酒，CY幾經辛苦先喺別墅內搵到四支平價紅酒，但尋日咁多人，四支酒每人半杯都唔夠分啦，CY都冇晒計，惟有同大家講唔好意思。奇就奇在，點解咁大間別墅只得四支酒咁少呢？
前朝宴客酒飲到夠
我哋翻查資料，貪曾在任時都經常喺粉嶺別墅宴客，前年七月一次，去年就分別喺一月同五月都宴請過立法會議員同民建聯，個個都係揸住杯酒滿場飛，所以粉嶺別墅冇酒都算係不可思議。
我哋之前獨家踢爆貪曾喺卸任前從禮賓府搬走咗大批酒，之前仲話多到要捐出嚟做善事，因乜嘢原因佢有咁多藏酒真係懸疑，唔通貪曾搬走禮賓府嘅茅台酒都嫌唔夠喉，連埋粉嶺別墅嗰啲酒都唔放過？無論點樣都好，貪曾只係留番四支平價紅酒喺粉嶺別墅畀CY，足以反映佢正一係自私精。