中環出更：鄭張永珍劍橋泛舟傷脊
出門遠行幾時都可能有突發事情發生，好似前政協常委、大慶石油公司嘅女強人鄭張永珍，早前就喺英國扭傷腰，休養個多月仍未康復。話說佢喺約兩個月前到訪英國劍橋大學，見到旁邊嘅康河綠樹林蔭，詩意盎然，泛舟其上細賞如畫風光之情油然而生，但當佢踏上晃蕩不定嘅小木船並準備轉身就坐之際，腰間突然發出強烈刺痛，於是就知今次出事喇。
經常滬港兩邊走嘅鄭張永珍匆匆結束訪英行程，然後選擇去上海求醫，經檢查後發現脊骨移位，傷勢都好嚴重。不過，幸好佢搵到一位好出色嘅推拿醫師，經過個多月嘅治療，情況已大有進展，雖然未曾完全康復，但已經毋須再用輪椅代步。
本來仲喺上海休養嘅鄭張永珍，日前就扶住拐杖步履蹣跚咁到沙田馬場，佢話返港除咗要為其愛駒打氣外，仲因為有業務要處理，兼且要出席霍家長孫霍啟剛同跳水公主郭晶晶既世紀婚宴。不過，佢話今次返港唔會留好耐，因為好快就要北上投票喎。