中環出更：工總主席鍾志平「濠」使錢

工總日前喺灣仔會展頒發本年度多個工業大獎，阿Roy變咗財神，老友紛紛叫佢請食飯，認真搞鬼。不過，派錢都唔及頒獎開心，事關晶苑集團主席羅樂風（Kenneth）榮登「傑出工業家」，提名佢嘅就係相識三十多年嘅立法會議員梁君彥（Andrew）。兩人都係製衣廠家，Kenneth七十年代同太太白手興家，早已認識做廠嘅Andrew，但同行並非如敵國，反而老友到極，睇住Kenneth生意不斷壯大，年產逾二億件成衣，Andrew都話飲得杯落。

陳家偉得獎喜上加喜

今屆仲有幾位青年工業家誕生，分別係家得路美國天然健康食品執行董事及總裁陳家偉（Calvin）、鴻利達模具董事總經理蔡俊杰，以及天虹紡織集團董事局主席洪天祝等。身為廠商會青委嘅Calvin得獎，商會高層及一眾青委兄弟紛到賀。呢位年輕工業家，仲有一個禮拜就榮升做爸爸，太太懷龍鳳胎，可謂三喜臨門。問佢炮製乜嘢補品慰勞老婆，Calvin不忘賣花讚花香話：「梗係食公司嘅健康食品啦！」

羅樂風（左二）獲頒「傑出工業家獎」，身為提名人嘅梁君彥（左一）與行政會議成員林健鋒（右一）及羅樂風太太（右二）碰杯慶祝。（溫國佳攝）

陳家偉（右二）榮登「青年工業家」，提名佢嘅副會長顏吳餘英（右一）、盧金榮（左一）及楊華勇（左二）都感到高興。

卓妮