橋唔怕舊，最緊要受。種金集資騙局曾經害到投資者雞毛鴨血，大家應該記憶猶新，點知最近又有人以投資為名，吸引市民落疊，真係花樣百出，唔到你唔服。
件事係咁嘅，有內地公司聲稱數年後來港上市，大搞講座，以「一萬元一年後變四萬多元，上市後升價百倍」作招徠，吸引市民購入公司嘅「紙上產品」換取點數。神奇之處係，點數每三個月會倍增一次，而公司上市之後點數價格隨時升近百倍，按照呢個如意算盤，兩萬元本金眨吓眼就可以變出幾百萬元，簡直係不勞而獲。你話喇，世界上有冇咁大隻蛤乸隨街跳吖！
咦，咪住先，喺本港進行集體投資計劃，必須得到證監會批准，否則屬刑事罪行。咁呢個計劃究竟得到批准未呀？其實，呢項投資計劃究竟係乜東東，投資者根本矇查查。根據公司註冊處資料，呢間公司自今年初開始集資以來，股東人數升至超過一百五十人，遍布中美港台，加上其他小額投資者，多達數百人，估計涉及金額二千萬元，都咪話唔和味。
講到呢度，大家有乜諗法呢？功夫茶又諗起呢句話：橋唔怕舊，最緊要受。大千世界無奇不有，再舊嘅橋，永遠都有人相信，永遠都有人落疊。
即係咁，如果投資兩萬元眨吓眼可以賺幾百萬，呢個世界就唔會有窮人喇，而煲呔曾爵士就唔使四圍黐飲黐食喇。可惜吖，呢幅美麗圖畫只係幻想嘅咋，投資者一旦種金美夢破滅，破財噩夢隨之而來，到時喊都無謂。
正如學者提醒，如回報過高或不合理，就要提防墮入投資陷阱。有執業大律師更加話，公司營運手法可能涉及串謀詐騙，投資者配合公司尋找「下線」會員，亦可能負上刑責。
嘩，集體投資隨時變集體行騙，問題可大可小，一來市民蒙受金錢損失，二來咯喎，如果涉及串謀詐騙，係刑事罪行嚟o架。係呢，當局有無察覺呀？有無監管呀？有無調查呀？如果無，港產官僚係咪集體蛇王呀？
唉，今時今日，投資陷阱無處不在，市民真係要帶眼識人，小心貪字得個貧呀。至於當局咯喎，萬惡不離其懶，好心金睛火眼(目及)實啦，等到市民誤墮投資陷阱至嚟補鑊就太遲嘞。
一句講晒，市民小心集體投資，當局切莫集體蛇王，快快查找不足，加強監管啦，如果又累到投資者血本無歸，你哋都走唔甩o架！