睇on.cc東方互動新聞，話說愛爾蘭三十一歲印度裔女牙醫哈拉珀納瓦，上月二十一日懷孕至十七周時出現流產迹象，她到醫院要求中止懷孕，但醫生指胎兒仍有心跳，又以愛爾蘭是天主教國家為由拒絕為她墮胎。胎兒兩日後死於腹中才被拿走，而哈拉珀納瓦在一周後亦因敗血症引致器官衰竭死亡。
呢單嘢固然又引起「墮胎法違反人權」嘅爭議，其實，更重要係帶出一本通書又點可以讀到老，時代不停進步，若然樣樣嘢墨守成規，咁馬丁‧路德‧金嘅名言：「人類道德的弧線很長，但最終指向正義」就會落空！
呢呢呢，現成又有個例子，好似話凡是前特首都可以出任「政協副主席」；之不過，捲入連串貪腐醜聞嘅曾蔭權爵士，下台後，依然有好些同佢糾結不清，當年力撐佢上台嘅利益集團，據悉亦頻頻游說中央「依例」畀個「政協副主席」貪曾過吓癮！
若然，難怪連建制派都有非常聲音反對貪曾「升呢」，皆因一個「貪盡海陸空」嘅特首出任政協副主席，唔單止「唔係咁好」，簡直係「播其惡於眾也」，加深一個職銜藏污納垢印象！如今連港區人大、政協、行會成員都齊發聲，指貪曾連普通政協也不配做，怕損國家形象也。
貪曾在位，令港人最深刻嘅實事就係做離岸特首豪住總統套房，咁嘅人如果仲可以上位，無疑應了瑞典一句俗話：無論你轉身多少次，你的屁股還在你後面。意思是說無論你怎麼做，人家都會說你不對。惡人惡事非最可怕，最可怕的是善惡的尺度被混淆！