根據尋日公布嘅行會個人利益申報，Jeffrey手上一共有十五個車位咁多。不過，Jeffrey話呢啲物業車位都係透過名下公司持有，所以呢啲車位係公司擁有，而身為股東之一嘅佢唔會隨便用嚟炒賣。唉，其實Jeffrey身為十九間公司嘅受薪董事，又使乜靠炒車位賺錢吖？況且佢淨係高爾夫球會籍都有四個啦！
至於另一行會新貴、新民黨主席葉劉淑儀申報表上就晒出一抽近八十個「名譽會長」，當中唔少地區組織、社團同婦女組織嘅名譽會長，唔通係插旗為選舉拉票？葉太就不諱言話：「咁直選係咁o架啦！」葉太解釋，做得直選議員，好自然要同地區人士多啲接觸，咁唔知今次立法會選舉，班漁民有冇幫佢手拉票呢？