政情：李樂詩膺教院榮譽博士
著名極地探險家李樂詩（Rebecca），尋日獲教育學院頒授榮譽人文學博士學位，以表揚佢喺推動環保及極地探索等方面所作出嘅貢獻，由兼任該校校監嘅特首梁振英親自主持儀式。呢次已經係Rebecca第二次獲得呢項殊榮，對上一次係二○○○年獲嶺南大學頒授相同學位，證明佢嘅成就深受各界認同。
Rebecca喺長達二十五年嘅探險生涯中，經歷過唔少險象環生嘅片段，但無阻佢對探險嘅熱誠。有次佢攀上珠穆朗瑪峰時，有巨石突然喺上面碌落嚟，好彩有棵大樹擋住；又曾懷疑因長期飲用極地受污染嘅水而患上結腸癌，幸而最終戰勝病魔。佢總共探索過南北極逾十八次，仲四度登上珠峰。
另外四位獲得殊榮嘅傑出社會人士，仲有香港「舖王」大鴻輝興業主席梁紹鴻，獲頒授榮譽社會科學博士學位，以及三位國際知名學者郭本彬、鍾秉林及傑夫．惠迪獲頒授榮譽教育學博士學位。