政情：王國興「主場」大毛筆壓陣
早前我哋講過，工聯會六位立法會議員喺不知情下，立法會辦公室「被規劃」到新大樓十樓，與人民力量及社民連為鄰，早前佢哋正式搬到上址，可惜到前日都仲未鋪設好啲電話線路。不過，「日以繼夜」嘅王國興間房早就執得妥妥當當，成間房唔單止掛滿自己書寫或朋友送贈嘅書法字畫，書枱上仲放咗近十支唔同長短、大細嘅毛筆添，而且仲有一支好以塵拂咁大嘅大毛筆，掛喺牆上鎮住辦公室。
興哥話，佢年年都會喺地區幫街坊寫揮春，嚟緊年宵亦都唔例外，但就會移師到工聯會嘅維園年宵市場攤檔，如果往年有攞開興哥揮春嘅街坊，就要密切留意喇。興哥早前講過會因應做咗香港島議員，打算搬回港島居住，但到依家都未搵到樓。佢話搵樓嘅事已交晒畀太太處理，但因為太太未決定好，所以依家仲住緊喺屯門。問佢會唔會住番當年發迹嘅北角和富中心呢？興哥就好肯定話唔會，因為想選擇啲方便落區見居民嘅地方喎。