政情：慢必擇偶 首要貓癡
愛護動物協會（SPCA）前日慶祝成立九十周年，前年經SPCA收養咗兩隻雄性孿生小貓嘅人民力量立法會議員陳志全（慢必）都有出席。一提起兩隻可愛嘅寵物「雄貓」，慢必就流露出一副溫柔相，話由於兩隻貓仔面圓圓，所以就幫佢哋改名做洋葱同薯仔。一向愛貓嘅佢仲心思思話想養多兩隻貓，但前提係要為自己搵咗個伴先喎。
不過，慢必話搵個伴都無想像中咁容易，首要條件係對方都要愛貓成癡。佢話之前執過隻叫小吉嘅異國短毛貓，但就喺幾年前不幸過身，皆因有次佢幫小吉剪毛嗰陣，唔小心剪親條貓尾，搞到小吉傷口發炎，之後帶隻貓去睇獸醫打針，但唔知係咪因為藥物敏感，小吉隨即患上嚴重腎衰竭，最後使咗成三萬幾蚊都救唔番。
同場嘅仲有食物及衞生局局長高永文，雖然高局長依家因為多嘢做而冇養貓，但原來佢屋企喺幾十年前係流浪貓收容所，高峰期仲試過同時收留三十隻貓添。