中環出更：偷閒陸恭蕙 溫馨歎茶

「環保女神」環境局副局長陸恭蕙（Christine）加入政府後，忙到連同屋企人飲茶都冇時間。前日下午大約一點鐘，卓妮行過金鐘中信大廈一間酒樓，見到Christine同幾個人開枱歎一盅兩件，其中一位洋人男士，貌似電訊公司前高層嘅Christine男友何力勤，仲有位活潑可愛嘅混血女童穿梭兩人之間，估計女童就係佢寶貝女兒。不過，我哋同Christine求證，佢就乜都唔肯講，只話係朋友同屋企人飲吓茶喎！
囡囡（右）不時挨埋過來同陸恭蕙（中）玩，兩母女感情融洽。
囡囡（右）不時挨埋過來同陸恭蕙（中）玩，兩母女感情融洽。

似三代同堂家庭樂

申報未婚嘅Christine，當日除咗同男友、囡囡一齊外，同枱仲有一男一女老人家，似足溫馨嘅三代同堂，睇嚟佢一啲都唔缺乏家庭溫暖。席間Christine唔係講好多嘢，多數係何力勤同兩位老人家傾閒偈，而囡囡就專心玩手機。但當囡囡挨過Christine身邊時，佢就慈母上身，成個人軟化晒。咁啱Christine由前日起首次署理環境局局長，唔知係咪因為咁，心情未敢放鬆呢？

貌似何力勤嘅洋人男士（右）好健談，講得指手畫腳，身旁嘅囡囡（左）掛住玩手機。（徐家浩攝）
  • 貌似何力勤嘅洋人男士（右）好健談，講得指手畫腳，身旁嘅囡囡（左）掛住玩手機。（徐家浩攝）

第一手消息請下載on.cc東方互動iPhone/iPad/Android/Windows Phone Apps