十月一日國慶放煙花期間，南丫島發生撞船海難，造成死傷枕藉嘅慘烈場面記憶猶新，大家有冇諗過調查會幾時完成呢？呢家嘢真係唔敢包，一來海難慘劇人數眾多牽連甚廣，二來負責調查嘅海事處效率成疑，唔知查到何年何月何日先至有結果。你知啦，人類一思考，上帝就發笑，官僚一辦事，眾生就發呆。
呢嗱嗱嗱，功夫茶絕無老屈成分，海事處調查速度緩慢係有迹可尋㗎。審計署日前發表報告，評核過海事處調查意外事故嘅工作進度，發現處方調查嚴重類別如火警、爆炸、涉及人命喪失等等意外嘅時候，八成半未能喺事發後三十周嘅指定時間之內完成調查報告，平均需時六十九周完成。調查時間最長嘅一宗個案竟然係三年有多，慢到呢，話佢哋係烏龜託世都唔過分。
好嘞，既然海事處調查速度緩慢到八成半未能達標，大家又點可能期望調查南丫島海難快馬加鞭呢？如果話呢一宗慘劇係香港史上最嚴重海難，功夫茶懷疑調查時間將會係史上最長，長過慈禧太后嗰一條又長又臭嘅紮腳布。
除咗調查緩慢之外，審計署仲踢爆海事處工作態度有問題，監管船隻牌照簡直去到自殘雙目嘅程度。審計署查核海事處紀錄發現，截至今年五月已領有效牌照嘅本地船隻有一萬五千六百七十二艘，另有一萬四千五百一十七艘嘅牌照已經過期。船隻牌照居然有一半過期已經得人驚啦，萬幾隻船等於無牌駕駛，更加匪夷所思嘅係，部分過期牌照可以追溯至一九七一年，即係過期超過四十年，你話係咪嚇鬼死人吖！
過期牌照個案之中，有三千三百一十艘船隻嘅檢驗證明書同樣過期。審計署就話嘞，相關船隻欠缺定期檢驗，如果繼續航行於本港水域，可能威脅其他港口使用者嘅安全，要求海事處針對呢一類高風險個案採取更適切措施。
喂，船牌又冇，檢驗又冇，萬一出事點算呀？南丫島海難清清楚楚咁敲響警鐘，一旦撞船，後果不堪設想，海事處係咪想無牌駕駛船隻搞到香港沿海風聲鶴唳呀？驗船呢家嘢有幾重要，三歲小朋友都知啦，情況就好比一個人要定期驗身，否則隨時暈得一陣陣撞崩個頭。
不過有一件事都幾荒謬，原來根據法例規定，只有船東先至可以要求海事處取消牌照，處方無權取消過期牌照。點解呢一條法例咁過癮嘅呢？如果擁有過期牌照嘅船東堅持出海，撞到人哋反艇條數點計？計功夫茶話齋，海事處檢討一下相關法例啦，有必要就向立法會提出修例，以免貽害蒼生吖嘛！