市區重建局董事會除咗主席張震遠外，仲有十七位非官方非執行董事，當中三位係預留畀立法會議員。去年十一月，政府以個人身份委任公民黨陳淑莊（Tanya）、民主黨涂謹申同工聯會黃國健（KK）出任非執董職務，而為咗配合上屆立法會任期，政府特意安排佢哋淨係做一年，並將會喺本月底屆滿。
由於呢個職位一定要係現屆立法會議員擔任，所以失落港島議席嘅Tanya一如所料冇得留低，改由同黨嘅法律界議員郭榮鏗出任新一任非執董。至於成功連任嘅阿涂同KK，雖然理應可以繼續留低，但佢哋竟然異口同聲話未必有咁嘅事，皆因直至現時都冇人搵佢哋商討延長任期嘅問題，亦冇收到任何感謝信表揚佢哋任內嘅表現，所以暫時仍然去向未明喎。