民主黨立法會議員黃碧雲上周五因為「一舊雲」投錯票，搞到內會以一票之差否決泛民主派就行政會議成員林奮強賣樓風波進行休會辯論嘅要求。為咗等班議員醒醒定定唔好再撳錯掣，秘書處原定喺尋日下午搞咗場「電子表決系統示範」雞精班，嚴重需要惡補議會知識嘅一舊雲當然急不及待報名參加啦。
不過，唔知係咪因為人數不足，秘書處前晚臨急臨忙通知一舊雲，話明白大部分議員可能有其他嘢做唔得閒上堂，所以要取消雞精班，又話會喺今日內務委員會上向議員解釋最新情況喎。有議員新丁話，一定唔會去上雞精班，事關覺得撳掣投票真係易過借火，冇理由咁大個人都好似小學生咁去上堂，一定會畀人笑到面都黃喎。
立法會秘書長陳維安（Kenneth）一片好心開埋晒啲速成雞精班，諗住等一班尊貴嘅議員唔使再出醜人前，點知就畀班新丁當佢無到，簡直就係浪費晒佢嘅一番苦心。