政情：葉劉請助理 個個係尖子
先嚟陳岳鵬，再嚟施俊輝，新民黨已經成為直通官場嘅白金升降機，個個名牌大學生後生仔入黨幾年後就走佬搵真銀，令佢哋有個「高官青訓營」嘅外號。但葉劉淑儀經歷過兩次經驗後，仍然對名牌大學生情有獨鍾，最近一次過請五位助理，一律都係名牌大學，唔通佢真係唔驚再被撬走人才？
呢五位後生仔，個個履歷都非常勁，有人讀劍橋大學主攻東亞研究，有人讀康奈爾大學修讀政策研究，最差一位已經係港大哲學及藝術雙主修，可以話粒粒皆星。葉太話唔諗住綁住佢哋，所以每個人都只係簽咗兩年嘅合約，佢哋鍾意走就走，鍾意去政府就去政府，當係幫政府培訓人才喎。
把口就話無所謂，其實葉太都好勞氣，最近四圍同人呻，點解有後生仔會當新民黨係踏腳石，無乜責任感呢？
好在葉太位愛女葉榮欣就唔諗住做叛徒，講明兩年後就算返美國史丹福大學讀書，讀完都會繼續幫媽媽手，唔會出去幫外人都唔幫自己人。葉太聽到阿女咁乖，由黑面即刻笑番晒啦。