政情：「保送」港區人大五人名單曝光
仲有一個多月就舉行嘅港區全國人大代表換屆選舉戰況空前激烈，勸進勸退之聲此起彼落，據聞首度有五人力保名單面世，五人嘅共通點都係來自團體或港九新界地域嘅代表，而且知名度稍遜需扶持一把。倘加上很大機會強勢入閘嘅前保安局局長李少光等人，預料真正開放予各界競逐嘅空缺不多於五個，睇怕爭取末席嘅幾個參選人，勢必要大打「人情牌」，先至有機會出線。
政圈傳言今屆港區人大選舉有約十人退下火線，因而吸引近七十至八十人明示暗示想參選，加上泛民主派和親泛民有二、三百票在手影響大局，據聞有關方面開始察覺到呢場選舉不可預知嘅變數好多，所以開始做好各方面的協調工作。
就喺呢個時候，政圈盛傳一份五人力保名單，五人分別係九龍社團聯會代表陳振彬、新界社團聯會代表陳勇、港島各界聯合會理事長蔡毅、南旋集團主席王庭聰，加上按慣例參選並力保當選嘅中聯辦代表。有分析指，佢哋嘅共通點都係所屬團體嘅接棒者，或是港九新界嘅具代表性團體領導層，其中有新界淵源者更有兩人，包括同新界工商界素有往來嘅王庭聰。
真正空缺 五隻手指數晒
有熟悉政情人士形容，倘若呢份五人力保名單屬實，加上幾名競爭力極強嘅疑似參選人，包括盛傳獲鼓勵參選嘅李少光、前中華廠商聯合會會長黃友嘉等人，剩低嘅空缺真係五隻手指數得晒，難怪「愛國歌手」張明敏等人遭有關方面勸退嘅聲音陸續傳出，原定極大機會當選嘅中華總商會副會長方文雄，早前亦突宣布打退堂鼓。至於其他未講明會參選嘅人士，就更加唔使旨意有機會喇。
正所謂「空穴來風，未必無因」，究竟今屆人大換屆選舉會否喺極高安全系數下開跑，定係會開放跑道予各方有心人自由競爭，或者可以睇吓下月初有幾多人報名參選時便可略知一二。