中環出更：李文俊嘆富二代唔易做
名人富二代經常被外界有負面標籤，原來理文造紙太子爺李文俊（Raymond）都深有同感，佢尋日出席中華總商會舉辦嘅企業家論壇時坦言，依家做富二代唔容易，最慘係深受社會輿論壓力，事關人哋覺得個個富二代都係「契弟」，淨係識得玩女人，所以作為富二代嘅心理質素一定要好。
Raymond又慨嘆，身邊唔少富二代傾向兩方面，一係懶惰，一係就急功近利，想做啲爸爸做唔到嘅事，結果炒股炒到損手爛腳；佢嘅心得係要好好地利用家族提供嘅平台發揮所長，凡事親力親為。
Raymond仲大爆十五年前有次同中總會長「牛仔褲大王」楊釗（Charles）食飯，Charles醒咗佢幾個傳承父業嘅秘訣，首要係要聽爸爸話，「試吓唔頂老竇嘴二十年，個江山就屬於你o架喇！」Raymond笑言，如果當年唔聽教，今日就未必有咁嘅成就喎。
卓妮