中環出更：金融猛人茶敍一刻
中環人分秒必爭，一邊歎茶一邊傾公事最愜意。本周一下午四點幾，卓妮路過置地廣場見做過港交所主席及行政會議成員嘅夏佳理（Ron）及李業廣（Charles），喺中環歎茶熱點Cafe Landmark歎下午茶，同枱仲有金管局總裁陳德霖太太、強積金管理局行政總裁陳唐芷菁，三位曾經或正在金融界呼風喚雨嘅猛人相聚，唔知傾乜嘢大計呢？
Charles亦係前積金局主席，同陳太係舊拍檔，兩人當然好熟啦，不過似乎阿Ron同陳太仲多嘢傾。當日阿Ron同陳太一見面就好客氣咁握手、互碰面頰，行足晒西式見面禮，然後並排而坐。席間兩人雞啄唔斷，阿Ron仲不時神情凝重，唔知好似遇到乜嘢阻滯咁。
期間Charles就靜坐兩人對面歎茶，後來先行埋單離去。阿Ron就同陳太繼續傾到六點幾鐘先至離開。卓妮上前同阿Ron打招呼，問佢傾緊乜嘢大事，佢笑笑口話，普通朋友飲茶啫！仲話最近好忙，又冇放假，事關佢係工作狂喎。
伍偉國巧遇許漢忠
其實當日卓妮仲見到經常親身巡視店舖兼歎茶嘅美心集團第三代掌舵人伍偉國（Michael），見佢同其他四名男女朋友喺度飲咖啡，但佢時不時低頭睇文件，氣氛似開會多過歎茶囉！當Michael離開時，又遇到機場管理局行政總裁許漢忠喺門口等位入座，兩人即時寒暄幾句，所以話中環真係細。
卓妮