香港愈來愈似一個壽星之都，平均壽命跑贏全球大市，大家知唔知點解吖？原因當然唔係好食好住啦，係人都知香港貧富懸殊非常嚴重，老人家每三個就有一個窮光蛋，絕對唔會因為安享晚年而長命百歲。
要探討港男港女嘅長壽之謎，不如從另一個角度入手。功夫茶考考大家，如果公公婆婆想入住安老院，最重要嘅條件係乜嘢呀？冇錯嘞，老人家必須鬥長命，保持呼吸千祈唔好斷氣，否則等到死都未必等得到宿位，因為特區政府嘅安老政策慢如龜速。社會福利署資料顯示，每年有大約四千名長者喺輪候入住安老院期間死亡，反映宿位嚴重不足。
前朝特首曾蔭權不但留低大量爛攤子，更加留低一個莊嚴承諾，引入社區照顧服務券計劃，資助長者喺社區購買服務，減低輪候院舍嘅人數以及時間。既然係咁，係咪應該貫徹老吾老以及人之老嘅敬老精神呀？社署助理署長李婉華話喎，盡快招標壓縮興建安老院嘅時間，政府除咗買位之外，亦會喺轉型院舍騰出宿位，過去數年藉此增加咗六百八十幾個護理安老院舍宿位，預料未來三年亦會增加宿位八百個。
喂，家陣講緊供不應求呀，每年有四千名長者等到死，未來三年增加八百個宿位鬼夠用咩！
另外咯喎，政府計劃喺元朗西鐵朗屏站興建一間安老院，提供一百二十五個宿位，設有二十個名額嘅日間護理單位，並且提供六十個名額嘅長者日間護理中心，工程總開支大概七千二百萬元。先唔計百幾個宿位實屬杯水車薪，大家知唔知幾時落成啟用呀？答案係十年，難怪立法會議員認為進度太慢。
好嘞，假設有一百二十五個公公婆婆有幸入住元朗安老院，係咪有必要最少延續十年壽命呢？鬥長命嘅最低標準係十年之內唔可以歸西、升天或者仙遊，香港唔變壽星之都就難咯，梗係一個二個老而不死啦。
就係咁，特區政府嘅龜速安老政策間接造就香港人延年益壽，講出嚟唔知好嬲定好笑。除此之外，立法會福利事務委員會討論相關事宜，工黨議員張超雄指出，現時護養及護理名額嘅比例是九比一，政策係向護養名額傾斜，要求政府重新考慮護養及護理名額嘅比例。
簡單講句，好心官老爺唔好咁忤逆啦，老人家辛辛苦苦為香港貢獻咗大半生，臨老過唔到世好慘o架，唔該安老政策快手快腳照顧長者享清福。畢竟人人都會老，他朝君體也相同，官場中人話唔定都有需要入住老人院，為人為己都要快馬加鞭增設宿位，以免不肖官僚日後瞓街吖嘛！