立法會上周五接連發生投錯票事件，先有民主黨黃碧雲投錯票兼無核對投票紀錄，導致內務委員會以一票之差，否決就行政會議成員林奮強賣樓風波進行休會辯論，黃碧雲因而贏得「一舊雲」嘅外號，之後又有公民黨陳家洛喺中止待續長津撥款時疑似投錯票，最後搞到要暫停會議。
為免再有啲「一舊雲」嘅議員投錯票，或者死撐自己無投錯票，立法會秘書處決定喺本周四特別搞番場「電子表決系統示範」，幫班議員補補課。
此外，秘書處尋日公布新一屆立法會嘅議員質詢次數統計，七十名議員當中，有四十五人都已提過質詢，有五名議員同以五條質詢並列第一，包括民協馮檢基、人力陳偉業、工黨張國柱、獨立謝偉俊同廠商會林大輝，五人都係資深議員，做咗咁多年都仲有咁多嘢問，真係好佩服佢哋。
至於廿八名新丁議員當中，暫以資訊科技界莫乃光最多嘢問，提過四條質詢，有十二位新丁，就至今一條質詢都未問過。