政情：肥仔明轉戰公關租劏房
早排我哋報道過，新一代「富貴黨」經民聯喺金鐘海富中心，以幾萬蚊月租，租個過千呎嘅辦公室做總部。估唔到泛民中人都有呢個財力，佢就係離開政界轉戰公關界嘅民主黨李華明（肥仔明），原來佢間公關公司都開喺海富中心，照咁睇肥仔明應該豬籠入水，唔係邊租得起咁貴地方呀。
肥仔明就話，個辦公室只係百幾呎嘅「劏房」，所以月租唔使一萬，平過經民聯好多。佢話自己唔少客戶係立法會中人同埋政府部門，所以租海富中心，都係貪方便啫。
做公關要靠樣搵食，最近肥仔明就唔合資格喇，因為佢啱啱做完激光手術，整走晒面上嘅疣同老人斑，所以塊面仲係紅到嚇親人。
佢話手術係皮膚科聖手史泰祖處理，手勢好好，但點都要隔多一排至變靚番，呢排惟有用住電話溝通，少啲見客喎。最近白鴿黨新人經常出醜，於是記者就問肥仔明有無過兩招畀啲黨友，佢即刻一支箭咁標走咗。老手即係老手，犀利！