政情：愛國歌王張明敏密密show
嚟緊嘅人大選舉係過往咁多屆最激烈嘅一次，要成功突圍而出，懶懶閒拉票絕對無可能當選，所以最近嘅大型社交場合，都成為疑似候選人嘅拉票場所。聽聞愛國歌王張明敏最近都非常活躍，可以話逢請必到，逢到必早，好似前日剛晶世紀聯婚，張明敏就早早到場。
「剛晶聯婚」匯集全港建制人士，有權投票嘅「選民」幾乎可以「一網打盡」。有人仲話，上星期民建聯二十周年籌款晚宴，都見到張明敏蹤影，佢唔止滿場飛，仲要上台獻唱首本名曲《我的中國心》，為民記籌到唔少錢，擺明向民建聯中人拉票啦。
今次人大選舉，選民有成千六人，比五年前多咗一倍，所以為求集中火力拉票，唔少人都會組隊聯合拉票，好似新界社團聯會理事長陳勇、九龍社團聯會會長陳振彬同港島各界聯合會理事長蔡毅，都決定互相支持對方，一於分工合作，咁拉票時就慳水慳力少少。