政情：周振基辣慶「潮」人
香港潮籍人士不嬲都好團結，成立九十一年嘅潮州商會更以和諧見稱，但近日商會尚未正式就職，已經爆出鬧不和嘅傳聞。有人爆料畀我哋聽，話新任會長周振基（Stephen）上任之後，將常董、會董嘅會費大幅度加價，常董會費更加至十萬元，但佢自己就竟然閂細水喉，只係畀咗二十萬，大家認為佢作風霸道，唔少老會長都好有意見，更加有會董因此退會。Stephen就話，會費加幅有理有據。
知情人士話，歷屆會長包括陳幼南、許學之、馬介璋、莊學山等一上場，乜都唔使講，即自揼五十萬，Stephen居然大幅「減價」超過一半，但又大幅加副會長、常董同會董嘅會費，據聞唐學元、陳偉南、陳有慶等前會長都有意見。仲有，以往商會搞會慶，都係由個會支付所有經費，但係今年個會只肯支付副主任以上人士嘅使費，其他會員要自費。知情者覺得，商會不嬲水頭充足，依家因乜事突然要改例？有人話Stephen仲打算向政府申請贊助下年嘅維港煙花匯演，質疑佢又要威又要慳住使。
周：新會費按比例計算
我哋搵到Stephen，佢就解釋話，其實會費嘅加幅公平合理，原則係按比例計算，副會長畀會長嘅一半，常董就畀副會長嘅一半，如此類推，佢話其實唔少社會團體都行緊呢一個系統o架喇。Stephen話，自己並冇畀少到會費，相反仲由以往嘅十五萬加至二十萬，只係舊年商會成立九十周年，上屆會長陳幼南畀多咗錢搞慶祝活動啫。
佢承認，今年的確係因應通脹加咗會費，舊年會慶九十周年，商會已經使咗唔少錢，加上商會規模漸大，活動較多，但帳目全部都清清楚楚。至於會慶費用，佢話會董係免費嘅，至於青委呢啲非會董級別雖然要畀錢，不過商會都有津貼。
Stephen話，會費加價係經過正規開會一致通過，預咗改革商會一定有反對聲音，不過呢啲只係短暫嘅誤會，大家都係想齊心做好會務啫。其實潮州商會一向情同手足，新任會長可能都要處理吓啲不滿聲音喎。