中環出更：姚君達成都開舖賣二手名牌
唔經唔覺，四川汶川大地震已經過咗四年幾，當地經濟已漸漸復甦，尤其是成都一帶，唔少港商都吼準龐大商機，紛紛進駐賺人仔。卓妮早前遇到米蘭站老闆姚君達（Byron），佢話前排去咗成都公幹，睇中當地仲未有二手奢侈品市場，打算同當地朋友合資開舖，實行飲「頭啖湯」。
睇中具發展潛力
Byron話，佢喺上海同北京兩個重鎮都有分店，但兩地經濟發展已達到飽和階段，反觀四川經濟啱啱起飛，仲有好大發展潛力，值得投資。除咗北望神州外，Byron仲睇好網上購物生意，慳番舖租之餘，又唔受地域限制。今年中國經濟增長有放緩迹象，Byron投資都較以往審慎，佢話依家開新舖會同當地人合資，兼且運用當地人開拓銷售網絡，開源節流。
早前內地抵制日貨，鍾情日本服裝品牌嘅Byron就話，倘情況蔓延至本港，佢會轉向支持本地品牌，服裝店Initial就係佢嘅心水之一喇。