工聯會最近因長者生活津貼立場同政府「打對台」，將工聯會部分巨頭「搣柴」之說不脛而走，不過喺呢個時候，工聯會已暗地裏決定咗今年年底港區人大代表換屆選舉名單，據聞榜上有名嘅係榮譽會長鄭耀棠同理事長吳秋北，反而身兼立法會議員嘅黃國健（KK）暫不在名單中，莫非工聯會先下手為強自行「搣柴」？
消息指，KK暫不在名單之列同「搣柴」完全無關，純粹係因為人大同議員最主要職能都係立法工作，基於KK再度出任議員，在二擇一嘅原則下順理成章須棄選人大。不過，KK接受查詢時未有斷言唔會參選，反而好玄妙話係咪參選人大都「無所謂」，最緊要評估對整個局勢嘅影響喎。
如果同政府「打對台」就要「搣柴」，大家一定會諗到身兼全國政協嘅工聯會名譽會長陳婉嫻，據聞工聯會並無硬性規定身兼議員嘅政協要退下火線，換言之重返議會嘅嫻姐理論上再做政協係無問題，但最終結果係點，仍有待下回分曉。