政情：唔埋白鴿堆葉建源受歡迎

立法會嘅教育界議席，張文光霸住多年，議席不僅係教協嘅資產，亦係民主黨嘅囊中物。民主黨幾經辛苦，至成功游說馮偉華循教育界出選，再經長時間游說，馮偉華至肯加入白鴿黨。點知人算不如天算，馮偉華喺臨門一腳因病唔參選，葉建源臨時拉伕接替，但係佢就點都唔肯加入白鴿黨。

公民黨同工黨力邀加盟

原來除咗白鴿黨外，同係民主派嘅公民黨同工黨都曾經接觸葉建源，力邀佢加盟。有工黨中人話，雖然葉建源同佢哋立場唔係咁一致，但由於工黨處於啱啱起步階段，任何合適人士都會考慮邀請加盟。

泛民三大政黨對招兵買馬嘅態度雖然尚算積極，但佢哋點都唔及攞到兩席嘅公共專業聯盟進取。據聞雖然公專聯今屆由零變二成績尚算唔錯，但有人覺得差唔多個個政黨都有至少五、六個人，於是有意邀請同屬功能組別、形象清新嘅葉建源加盟壯大聲勢，又話已經頻頻搵對方摸底。

唔想咁快「嫁」　傾向公專聯

忽然變成各黨羅致對象，葉建源承認各大政黨都有人拉攏過佢，不過就話佢哋講嗰陣唔算太認真，所以都唔知算唔算邀請。佢又話雖然有時會覺得一個人做晒所有嘢會有少少辛苦，但自己暫時仍然非常享受獨立生活，唔想咁快「嫁」入政黨畀人綁住。不過講講吓，葉建源又話公專聯唔綑綁投票嘅立場都算幾特別，起碼講嘢前唔使吓吓都要問個黨應該點答。睇嚟佢雖然未有意願，但有啲傾向喎。

個個黨都向佢伸出橄欖枝，葉建源唔知覺唔覺得自己好巴閉呢？佢謙虛話唔覺得自己係搶手貨，又話大家都搵佢，係因為同佢熟喎。