橋唔怕舊，最緊要受。街頭騙案萬變不離其宗，來來去去都係嗰幾招，奇就奇在，就算招數見慣見熟，冇乜新意，一樣不斷有人上當，唔到你唔服。呢，尋日橫頭磡邨又有一位阿婆被祈福黨呃去廿幾萬元現金，行騙手法又係嗰套，騙徒聲稱阿婆家人有事，要幫佢祈福喎，就咁，阿婆乖乖奉上老本，成為街頭騙案最新受害者。
港府宣傳廣告話，家陣市民醒目咗，騙徒冇咁易得手喎。事實係咪咁呢？警方數字顯示，去年街頭騙案比前年勁升六成七至一百零二宗，單係祈福騙案，今年首季就比去年同期暴升七成五，達到二十八宗。你話喇，騙徒屢試不爽，長騙長有，市民究竟有冇醒目到呢？
即係咁，如果話街頭騙案完全冇新意，咁又未必嘅。嗱，最近經常喺街頭出現嘅「鮑魚黨」，行騙手法同祈福黨、寶藥黨就有啲唔同喇。鮑魚黨以集團式運作，每日有十幾個攤檔喺唔同地點售賣乾鮑魚、乾沙蟲等海味，顧客一唔小心，隨時中招o架。
一名替鮑魚黨做媒嘅「劏姐」向本報獨家爆料稱，每個鮑魚檔由一名「師傅」帶同兩名「劏姐」劏客，主要手法係用廉價大陸海味冒充澳洲等貴價貨，售價比市價貴逾五倍，山大斬埋有柴，成個集團一個月營業額閒閒哋超過二百七十萬元，簡直係豬籠入水！
「劏姐」仲話，鮑魚黨為求萬無一失，每次交易成功後，都會派佢哋跟蹤客人一段路程，確保客人唔會發現受騙而折返。而「劏姐」為防止被客人認出，每日都會轉去唔同地點開工。至於劏客目標咯喎，除咗最容易上當受騙嘅師奶阿婆之外，仲有內地旅客添！
講開又講，鮑魚黨其實出現咗好多年嘅喇，只不過以前唔係好多人留意，近年由於愈來愈猖獗，愈來愈多人中招，先至引起關注咋。消委會資料顯示，投訴鮑魚黨數字由○九年十九宗激增至去年六十三宗，三年涉及款項近八十五萬元；而海關就話，近年共接獲五十宗有關購入假鮑魚及以斤両混淆嘅舉報，今年初成功檢控兩名商販喎。
嗱嗱嗱，鮑魚黨猖獗成咁，海關執法懶懶閒實在難辭其咎o架。香港假假哋都係「購物天堂」，依家搞到街頭騙案無日無之，香港臭名遠播，再咁落去，天堂隨時變地獄，唔止市民受害，想搵旅客上門都幾難咯。計功夫茶話齋，街頭騙案唔可以姑息，海關又好，警方又好，或者其他執法部門又好，唔該認真做好你哋份工喇！