本身係骨科名醫嘅食物及衞生局局長高永文，尋日去咗和合石墳場為一個植樹活動主禮，並參觀和合石新靈灰安置所及火葬場。當佢同在場人士分享到香港嘅骨灰龕位需求緊張時，就叫台下嘅人幫佢做見證，聲稱自己死後會選擇撒骨灰，估唔到佢為咗減低骨灰龕位需求，百無禁忌交代埋自己嘅身後事安排，佢呢個局長真係唔話得。
尋日好猛太陽，高永文行咗一陣就口渴去攞果汁飲，但就叫個侍應加入有汽礦泉水，佢話依家市面出售嘅飲品太甜，應該要加水開稀，留番少少甜味就夠喎。
高局長飲完果汁潤喉，轉頭就走去同在場嘅小學生吹水，由做運動傾到環遊世界，再一次見證局長嘅親和力，但就傾到連典禮開幕時間都差啲唔記得咗囉。