政情：孖辮妹葉太 青春真可愛
青春，真可愛青春！新民黨主席葉劉淑儀尋日喺佢個社交網站專頁，上載咗六張圖片，包括佢母校聖士提反女子中學最近舉辦嘅舊同學聚會，同埋佢中學時嘅幾張學生妹相。
其中一張係佢畢業時嘅全班大合照，葉太喺相片入面用蝴蝶結紮起孖辮，真係好青春o架。另一張舊照就見到幾位女同學排排坐、拍晒手，好奔放咁唱緊歌，唯獨係葉太就表情嚴肅，雙眼直望個鏡頭，好似喺度講緊：「影乜鬼嘢呀！」
當中一張係葉太同前教統會主席林李翹如嘅合照，原來林太做過葉太嘅西史科教師，並盛傳特別錫佢。
葉太喺專頁上好感觸咁話，多得Miss Lee嘅教導，令佢由中二到中七，歷史科成績都名列前茅，公開試更獲A級，「兒時校園生活，一幕幕重現眼前……四十五年了」。
葉太同我哋講，佢同屆同學大部分都從事醫生、律師或大學教授等專業工作，得佢一個從政，而且每五年先搞一次舊生聚會，但大家感情仍然好好，不時都有聯絡，因為佢大部分同學或老師都係港島區居民，不時會同佢反映區內意見。