教育局局長吳克儉早前飽受德育及國民教育科風波困擾，諗住事過境遷後專心工作，點知近日又再捲入負面傳聞，講緊嘅係有網民突然單方面指控吳克儉有「私生女」。
吳克儉尋日出席活動後親自回應傳聞，指傳聞「純粹惡搞，絕無其事，子虛烏有」，今次佢迅速解畫，比當日回應國教嘅閃縮表現，係進步咗，但能否成功「拆彈」就另計喇。
據聞呢個傳聞首先喺兩個網頁中流傳，不約而同由網民引述所謂「極可靠知情人士」稱，吳克儉同某內地女子有「風流帳」並誕下私生女，又指稱該名內地女子曾從深圳抱住「單非囡」來港注射疫苗搵人幫手，當時吳克儉正喺立法會遭議員質詢，一時迴避拒不接見，其後吳克儉將母女送回深圳安頓，並言之鑿鑿話雙方正爭奪呢個「私生女」嘅撫養權喎。
問責局長有婚外情甚至有私生女傳聞，真係可大可小，所以吳克儉不敢怠慢反駁指事件「純粹惡搞，絕無其事，子虛烏有」，當問及係咪成日返內地甚至有內地女朋友時，吳克儉斬釘截鐵話冇，又強調唔係成日返內地，僅承認曾去上海講學咋喎。