政情：黃士心娶新抱 大仔被當「老襯」
康泰旅行社董事長黃士心有兩子一女，大仔黃進達（Jason）同細仔黃進德（Johnny）都生得高大威猛，又事業有成，而且仲係未婚添，肯定成為唔少女士嘅傾慕對象。近日有傳黃老闆將於十八日娶新抱，大家紛紛打去恭喜Jason，點知Jason澄清叫大家千祈唔好搞錯，做老襯嗰個並唔係佢，而係佢細佬Johnny先至真。
唔少人一聽到黃老闆娶新抱，好自然會認為係大仔Jason做新郎哥，又好難怪嘅，事關Jason擔任康泰董事總經理，經常跟住爸爸出出入入，搞錯佢結婚都唔出奇。
不過，Jason並無因此而煩惱，事關弟弟結婚都係喜事，開心都嚟唔切啦！至於幾時先至真正到Jason同女友拉埋天窗？佢就以一貫笑意盈盈咁答：「遲啲先啦！」雖然Jason冇講點解，但相信佢係想現階段以事業為重喇。