政情：議員北望神州
熱錢瘋狂流入，外地資金不斷流入香港搵食，總之有投資價值嘅就乜都炒一餐。雖然係咁，但法律界立法會議員郭榮鏗（Dennis）近日就出售咗持有嘅將軍澳物業，而白鴿黨涂謹申更慘遭業主收回車位出售。至於金融服務界議員張華峰仲申報增持咗一個內地物業，自由黨紡織及製衣界議員鍾國斌（Felix）申報內地擁有一個物業，莫非佢哋真係睇淡咗香港樓市轉戰內地樓市？
Dennis早排向立法會秘書處更新利益申報，佢嘅物業由兩個減持至一個，佢話七月時已經諗住賣走將軍澳嘅細單位套現，當時已傾好價錢，仲簽埋臨時買賣合約。Dennis強調，整個物業買賣程序係佢宣誓成為議員後先至正式完成，成交後已經拿拿臨補番申報。不過，佢就點都唔肯講成交價係幾多錢，又講笑叫人估吓佢賣樓係為咗套現定睇淡本地樓市喎。
Dennis賣樓，阿涂就慘成物業價位上升嘅受害者，佢依家租緊嘅車位升到九十萬元，業主見機不可失，即時收回放盤。
阿涂話，業主其實算唔錯，第一時間問佢想唔想接貨，但無奈佢冇咁多流動資金，所以只好望位興嘆。即將冇位泊車，阿涂話會盡快開始物色租盤，不過，佢住嗰區車位供應唔多，相信未必咁快可以搵到好位喎。
除咗上述兩位議員外，張華峰嘅物業利益申報亦有變動，佢喺大約一個星期前申報增持一個上海物業，佢話睇好內地物業發展前景，覺得內地物業升值升得快，所以寧願揀喺內地置業。張華峰又話，上海本身又係經濟發展最快嘅城市，相信喺幾年之內一定會超越香港成為國際大都市。
鍾國斌北京廣東持舖位
Felix近日亦有向秘書處申報喺內地持有物業，但原來嗰項物業係之前漏報咗！Felix解釋，九四年已經喺北京同廣東購入兩個商業單位，但之前就唔記得咗申報，近日發現漏報後已經即時補番。睇見Felix揸住呢兩個物業咁多年，相信佢都睇好內地樓市嘅升值潛力喇。