中環出更：康叔出書 政商名人齊捧場
近日不時有政界人士出書月旦時事，但要數到最具影響力嘅當然首推前港區全國人大代表吳康民（康叔），佢嘅新書首發式每次都高朋滿座，好似前日發表嘅遊記新書，出席嘉賓個個都係重量級人物，包括有特首梁振英（CY）同教育局局長吳克儉、全國人大常委范徐麗泰、港區人大代表團長袁武等都出席，難怪席間有人笑言康叔嘅新書發布會幾可媲美賀壽活動！
康叔嘅彩色旅程第七集，《站在世界最高的塔樓下》遊記新書發布會前日喺金鐘一間酒樓舉行，親中圈子嘅重量級人物空群而出捧場，包括久未露面嘅「製衣大王」陳瑞球、僑界社團聯會主席陳有慶等。
另外，亦有部分有意參選港區人大換屆選舉嘅政界人士「滿場飛」，但最具分量嘅出席者當然係CY啦，席間CY同康叔更「互笠高帽」。
CY祝新作一紙風行
康叔首先爆料，話CY曾經應承過每逢佢有新書發布，就一定會來捧場，CY對此「絕無食言」，又笑言自己因為潛心寫作，已由教育工作者變成政治評論員。
CY致詞時則大讚康叔係香港少有多產作者，祝願佢繼續旅遊並將所見所思所聞用文字同大家分享，又希望康叔嘅新書一紙風行，登上香港暢銷書榜喎。