中環出更：蒙德揚 馬場焗麵包饗客
尋日沙田馬場傳來一陣麵包香味，事關信興集團贊助樂聲盃賽，副主席蒙德揚（David）利用新麵包機即場焗麵包畀大家試食，同場嘅港區全國人大代表王英偉已經急不及待預訂咗一部，打算同太太一齊玩焗麵包喎。David媽咪楊雪姬難得現身支持囝囝，仲有太太園田惠美、家姐蒙倩兒、弟弟蒙德勳等齊出動，分工合作招呼賓客。
卓妮見蒙老太氣色唔錯，David話，媽咪以前不時有入馬場湊熱鬧，但自從做完脊椎手術之後身體轉差，街都出少咗好多，今次係應老友要求出嚟見吓大家。記得往年David習慣喺盃賽煮靚飯，但今年就轉焗麵包，佢話消委會有研究指市面出售嘅麵包含唔少防腐及添加劑，食落肚冇益，故佢向廣大家庭推廣自製健康麵包。
今年電器市道比去年差，David預告其公司未來會以環保及節能電器做主打，除咗智能調溫雪櫃外，明年仲會推出一款價值過萬元嘅電飯煲，至於點解賣咁貴，佢就話要賣個關子喎，唔通唔使落米都煲到飯？著名小提琴家姚珏同丈夫魯恭都喺度，佢哋啱啱去咗歐洲度假兩星期，慶祝結婚十五周年，滿載而歸。
發叔囝囝贏盃拉頭馬
講番場樂聲盃，由鄉議局主席劉皇發公子劉業強同太太劉葉愛愛匹「驌龍」跑出，穩袋一百一十四萬元獎金，發叔舉家拉頭馬，仲擺出勝利手勢，風騷到極。
卓妮