香港有兩種非常有特色嘅交通工具，第一種係擁有過百年歷史嘅電車，香港人通常好親切咁叫電車做叮叮。至於第二種咯喎，就係香港獨有嘅小巴嘞。由於小巴嘅特色唔係以歷史悠久取勝，而係以飛車出名，所以呢一種交通工具嘅叫法係「亡命小巴」。
為咗防止亡命小巴橫衝直撞，本來應該懶到出汁嘅官老爺都唔敢偷懶，諗咗好多辦法保障乘客同路人嘅寶貴性命。企圖阻止小巴司機成為亡命之徒嘅辦法簡直絞盡腦汁，先有安裝速度顯示器，再有增設限制速度器，雖然前者只係嗶嗶作響效用不大，不過後者點都叫做積番唔少陰德，畢竟時速強制限於八十公里以下確係可以避免大量慘不忍睹嘅車禍。你知啦，亡命小巴一個二個當自己係頭搖又尾擺嘅車神，如果冇限速器，時速百幾二百公里狂飆真係唔撞死都嚇鬼死。
問題係，道高一尺永遠魔高一丈，你以為重重設限就可以杜絕小巴胡作非為咩？當然唔係啦，小巴即使冇超速一樣可以撞死人。冇耐前之嘛，旺角彌敦道同亞皆老街交界就有一宗奪命車禍，一架載有乘客嘅紅頂小巴撞到一名男途人遠遠彈飛，當場噴血昏迷，送院搶救不治，小巴司機涉嫌危險駕駛導致他人死亡被捕扣查，呢單只係冰山一角嘅咋。
既然小巴繼續亡命，功夫茶真係好同意警方嚴厲執法o架，就算未出事都要打擊違法行為，例如超載。新界北交通部定期派出隱形戰車監視兜截，喺一個代號叫做Leaf-Flyer嘅行動之中，凌晨五點幾發現一架來往天水圍同尖沙咀嘅610S專線小巴，車上竟然有二十個乘客，超載嘅四人之中有三個被迫以企位搭車。
喂，係人都知小巴係十六座o架啦，接載二十人危唔危險啲呀？萬一大吉利是一車二十命都唔知點算好，保險冇得賠o架。警方即場以危險駕駛以及無第三者保險駕駛罪名拘捕涉案司機，可能已經防止咗一次致命災難。
呢嗱嗱嗱，官老爺真係唔可以偷懶o架，習以為常嘅官僚主義必須拋諸腦後，否則亡命小巴只會陸陸續續害人不淺。好似呢一次Leaf-Flyer嘅行動咁吖，警方截停兩架超速小巴，其中一架車速顯示器竟然反覆跳動於一百五十至二百公里之間，唔排除有人故意干擾顯示器製造壞錶錯覺，實際上當時嘅車速都超過每小時九十公里。
公平講句，自從小巴增設限速器之後，死傷枕藉嘅特大車禍已經少咗好多，不過警方都唔可以掉以輕心o架，唔能夠容許少數不法之徒草菅人命。唔理係超載定係超速，一概執法嚴拿先至啱數！