政情：搞殯儀同民協 KK一樣靠等
民協立法會議員馮檢基（KK）一向鍾意搞社企援助弱勢社群，繼咖啡室同二手用品店後，KK一年前進軍殯儀業幫老人家諗定身後事。不過，KK話殯儀服務公司開業至今仍然未上軌道，事關殯儀服務要等做咗會員嘅老人家過咗身後先可以正式展開，老人家一日未過身，公司都唔可以抽佣賺錢喎，所以現階段仲未有錢賺，搞到佢唔敢搵街舖同請多幾個職員，真係大吉利是。
睇番KK經營殯儀社企嘅例子，就會發現同佢營運民協嘅方式同命運如出一轍，事關KK經常話要贏多啲議席壯大民協嘅聲勢，之前立法會選舉仲話要打破一席嘅宿命添，只可惜難逃宿命，僅保住自己個議席免受滅黨命運。所以話呢，如KK一日唔退落嚟，下面嘅新人都幾難上位，就好似佢辦殯儀社企一樣，只係個「等」字，又或者有朝一日民協可以打破宿命都未定。