政情：Ann姐夠sharp 民記慳工夫
今屆立法會新人特別多，所以就算佢哋上咗任一個多月，市民都未必分得清楚佢哋個樣同個名，不過其中亦有人「脫穎而出」，其中一位就梗係實業家蔣震嘅二千金、民建聯嘅蔣麗芸（Ann姐）啦！Ann姐高聲質問「使唔使炒咗佢」嘅形象咁深入民心，地區為佢搏命嘅民建聯兄弟姊妹反而話可以慳番啲工夫，唔使刻意為佢建立形象喎。
話說四年前，今屆超級議員李慧琼（Starry）喺首次贏得九龍西議席後，地區班兄弟姊妹用咗唔少時間為佢樹立形象，又經常為Starry設計話題，畀佢有更多機會曝光。所以就算Starry依家形象仍然唔太鮮明，但亦算係成功塑造咗中產同基層嘅形象。
反觀Ann姐，有喺地區幫佢手嘅兄弟姊妹就話，雖然Ann姐忽然成為新一代炮手，但佢始終有一定嘅知名度，一直又有關注中小企、商界嘅問題，所以佢亦因此而樹立咗自己嘅形象，班兄弟姊妹唔使為佢裝身，可以專注去做地區工作。