政情:蔡涯棉忽然做咗行會成員

立法會房屋事務委員會日前通過無約束力嘅動議,要求政府擱置容許白表申請人免補地價購買二手居屋嘅建議,令特首梁振英(CY)須急急澄清,一直支持有關建議嘅房委會委員蔡涯棉更發表公開信,促請立法會三思。有電台尋日邀請蔡涯棉出席節目講解有關問題,竟然喺新聞稿寫錯咗佢做行政會議成員,認真烏龍。

不過話說回來,蔡涯棉喺特首選舉時已經係CY嘅忠實粉絲,多次為CY同新政府保駕護航,早前佢力主將啟德體育城用地改為興建公營房屋,更被外界認定係受命幫政府放風,依家佢又幫政府力撐活化居屋二手市場建議,難怪會畀人誤認佢做行會成員。

同樣熟悉房屋同樓市嘅「正印」行會成員林奮強,最近因涉嫌非法加佣賣樓風波而無限期休假。其實CY都可考慮吓「替補」蔡涯棉入行會,為政府出謀獻策及向市民推銷政策,但前提係要搞清楚佢有冇喺政府出招壓抑樓市前賣樓,以免再惹風波。

第一手消息請下載on.cc東方互動iPhone/iPad/Android/Windows Phone Apps