政情：嫻姐收聲跪低撐長津？
今屆立法會選舉一共贏得六個議席嘅工聯會，論人數氣勢十足，尤其係「當年票后」陳婉嫻重返立法會後，更係如虎添翼，可惜佢哋最近喺長者生活津貼（長津）撥款一役上就搞到兩面不是人。不過，近日有傳工聯會準備跪低投棄權票令撥款通過，而一直企硬反對長津原方案嘅嫻姐，尋日見完特首梁振英（CY）後就粒聲都唔出，寧願交畀同僚議員麥美娟去應付傳媒，莫非有關方面要佢收聲做好跪低嘅準備？
老當益壯嘅嫻姐重返議會後，一直發炮批評現屆政府，尤其係長津議題更與泛民主派為伍，但尋日見佢同班同僚議員見完CY後，好似鵪鶉咁冇晒聲氣，仲特登企喺五名同僚後面，叫麥美娟代為出聲，全程保持沉默。有人估計，嫻姐收聲主要為工聯會轉軚做緩衝區，事關佢一出聲，大家實問佢對長津嘅投票立場，答咗反對又怕「講大咗」影響大局，更同四十萬長者過唔去，但答棄權又會被人話佢轉軚同跪低，所以都係少出聲為妙。
兩手準備 反對或棄權
今日財務委員會將審議長津撥款，據聞工聯會對投票已有兩手準備，如果民建聯全部乖乖坐定定，即係政府實夠票通過的話，咁工聯會六人就會全投反對票，一來顯示該會立場堅定，二來又唔怕攪亂檔，得失晒全港四十萬長者。如果建制派唔齊心，票數相當接近時，工聯會就會先拍枱鬧政府，然後投下棄權票，甚至乎再絕啲，出動「離場抗議」呢招，既可以表態，亦間接令撥款成功通過。
鋒芒太露惹同僚微言
不過，嫻姐忽然收聲都有另一說法，就係話佢近日將所有鎂光燈吸走晒，仲做埋最受歡迎議員之首，搞到「日以繼夜」嘅王國興都黯然失色，另外三位新丁議員更加唔使講，畀人當係隱形。據聞工聯會內部都有微言，覺得嫻姐鋒芒太露搶晒焦點，搞到其他同僚冇咩發揮機會，所以嫻姐先至收聲，交波畀麥美娟發言。但觀乎尋日麥美娟表現得有啲慌張，又唔多似事前有所準備咁，究竟邊個版本信得過，大家就自行判斷喇。